24. febrúar 2023
Vestnorden ferðakaupstefnan haldin á Íslandi í haust
![Ljósmynd](https://images.prismic.io/islandsstofa/97f3bdd9-54be-4060-acaa-e232a3789581_Reykjavik_Hallgrimskirkja_Autumn_Iceland.jpg?ixlib=gatsbyFP&auto=compress%2Cformat&fit=max&w=1621&h=1080)
Vestnorden er mikilvægur vettvangur fyrir íslenska ferðaþjónustu.
Vestnorden ferðakaupstefnan verður haldin í Reykjavík dagana 17. - 19. október 2023.
Vestnorden er stærsti viðburður sem haldinn er í ferðaþjónustu á Íslandi og búast má við um 500 gestum til landsins til að taka þátt í kaupstefnunni sem fer nú fram í 39. skipti. Þar koma saman ferðaþjónustuaðilar frá Íslandi, Grænlandi og Færeyjum og kaupendur ferðaþjónustu, eða ferðaheildsalar, víðs vegar að úr heiminum. Þá koma einnig til kaupstefnunnar blaðamenn og boðsgestir. Í tengslum við Vestnorden gefst ferðaheildsölunum auk þess kostur á að fara í kynnisferðir til landanna þriggja.
Ferðamálasamtök Norður-Atlantshafsins (NATA), sem er samstarfsvettvangur Íslands, Færeyja og Grænlands á sviði ferðamála, standa að Vestnorden. Löndin þrjú skipta með sér umsjón með ferðakaupstefnunni en hún er haldin annað hvert ár á Íslandi.
Íslandsstofa er framkvæmdaraðili að kaupstefnunni í ár. Á Vestnorden er lögð áhersla á ábyrga ferðahegðun og sjálfbærni og fellur því vel að áhersluatriðum íslenskrar ferðaþjónustu
Nánari upplýsingar er að finna á vef Vestnorden. Taktu daginn frá!