Aðgerðir Íslands í tengslum við heimsfaraldur og eldsumbrot ræddar á IMEX

Meet in Reykjavik sótti kaupstefnuna IMEX í Frankfurt þann 14. maí sl. ásamt níu íslenskum fyrirtækjum á sviði ráðstefnu- og hvataferðaþjónustu (MICE). Samhliða kaupstefnunni fór fram málstofan The Policy Forum, vettvangur fyrir stjórnmálaleiðtoga til að ræða tækifæri og áskoranir í ráðstefnu- og hvataferðaþjónustu út frá sjónarhóli áfangastaða.

Þórdís Lóa Þórhallsdóttir forseti borgarráðs og stjórnarformaður Meet in Reykjavík sótti málstofuna og tók þar þátt í samtali stefnumótenda áfangastaða. Sigurjóna Sverrisdóttir, viðskiptastjóri Meet in Reykjavík var með í för og kynntu þær fyrir viðstöddum aðgerðir Íslands og Reykjavíkur í kjölfar landamæralokana vegna COVID-19 faraldursins og eldsumbrota á Reykjanesi. Hvoru tveggja hefur vakið athygli innan ráðstefnu- og hvataferðageirans sem vel heppnaðar aðgerðir til að takast á við óvæntar eða óhefðbundnar áskoranir.  

Í framhaldinu tóku á annað hundrað fulltrúar áfangastaða á sviði ráðstefnu- og hvataferðaþjónustu þátt í vinnustofu þar sem framtíð ráðstefnu- viðburðarhalds var rædd meðal annars út frá nýsköpun, gervigreind, siðferðilegum áskorunum, sjálfbærni o.fl.

IMEX kaupstefnan er haldin árlega í Frankfurt og er ætluð MICE fyrirtækjum, þar sem þeim gefst tækifæri á að kynna þjónustu sína fyrir kaupendum alþjóðlegra ráðstefna, hvataferða, funda og sýninga. Íslandsstofa sér um utanumhald á Íslandsbás undir merkjum markaðsverkefnisins Meet in Reykjavik – Iceland Convention Bureau. Níu fyrirtæki tóku að þessu sinni þátt í sýningunni undir hatti Meet in Reykjavik, en það voru Atlantik, Discover True North, Essence of Iceland, g-events dmc & pco, Harpa, Iceland Hotel Collection by Berjaya, Iceland Travel, Icelandair og Íslandshótel.

Hér fyrir neðan má sjá nokkrar myndir frá kaupstefnunni