Útflutningsgreinar
Hugvit og tækni
Hugvit og tækni
Gerum hugvit, nýsköpun og tækni að burðarásum verðmætasköpunar og gerum Ísland að eftirsóttum stað til rannsókna, þróunar, og fjárfestinga.
2x
aukning á útflutningstekjum frá 2013
71%
fyrirtækja sjá fram á vöxt
41%
fjölgun stöðugilda
800
sérfræðingar óskast
Hugvit er óþrjótandi auðlind
Íslendingar hafa sett sér metnaðarfull markmið um hlut hugvits í hagvexti til framtíðar. Fyrir því liggja einfaldar ástæður. Aukning útflutningstekna framtíðar þarf fyrst og fremst að vera knúinn af útflutningsgreinum sem byggja á hugviti fremur en greinum sem byggja á náttúrulegum auðlindum þar sem vexti eru takmörk eru sett.
Markmiðin krefjast starfsfólks og fjárfestingar
Sjálfbærni, þekking, nýsköpun, aukin fjölbreytni og virðisauki eru lykilhugtökin í stefnu stjórnvalda og atvinnulífs um nýfjárfestingar í íslensku atvinnulífi.
Til að tækni- og hugverkaiðnaður fái dafnað hér á landi og nái þeim markmiðum sem honum hafa verið sett er þörf fyrir umtalsverða aukningu sérmenntaðs vinnuafl sem sækja þarf út fyrir landsteinanna. Að sama skapi er mikil þörf fyrir aukna erlenda fjárfestingu innan greinarinnar. Í báðum tilfellum á Ísland í harðri samkeppni um þessi gæði við önnur lönd.
Aukum vitund um Ísland fyrir fólk og fyrirtæki
Í viðhorfsmælingum sem Íslandsstofa framkvæmir kemur fram að Ísland stendur lakar en önnur Norðurlönd þegar kemur að nútímalegum innviðum, sterku atvinnulífi og nýsköpun. Aukin þekking á landinu eykur samkeppnishæfni og auðveldar okkur að laða að vinnuafl, fjárfestingu og efla hagvöxt.
Markaðsstarf Íslandsstofu miðar að því að auka vitund um Ísland sem ákjósanlegan stað til búa, mennta sig og starfa, ekki síður en til rannsókna, þróunar, og fjárfestinga.
Aðgerðir á markaði
Verkefni á sviði hugvits og tækni
Reykjavik Science City
Hugvit, nýsköpun og tækni verða burðarásar í verðmætasköpun Íslendinga. Þetta er markmið starfsins í Vísindaþorpinu í Vatnsmýri eða Reykjavik Science City sem kynnt var formlega í nóvember 2021.
Tilgangur verkefnisins er að stuðla að því að Ísland verði eftirsóttur staður til rannsókna, þróunar og fjárfestinga auk þess að laða erlend fyrirtæki og sérfræðinga til landsins.
Íslensk vaxtarfyrirtæki á uppleið
Niðurstöður könnunar Íslandsstofu sem gerð var meðal fyrirtækja á sviði hugvits og tækni gefa ástæðu til bjartsýni. Útflutningstölur fyrir árið 2020 sýndu að vægi útflutningstekna á sviði hugvits og tækni hefur aukist úr 7% í 15%. Þegar könnunin var framkvæmd á ný árið 2021 kom í ljós að fyrirtækin gera ráð fyrir áframhaldandi vexti og flest hyggjast þau fjölga starfsgildum á árinu 2022.
