Íslenskur fiskur í aðalhlutverki í Strassborg

Veitingastaðir í Strassborg buðu viðskiptavinum upp á íslenska sjávarrétti í tengslum við kynningu Seafood from Iceland

Markaðsverkefnið Seafood from Iceland stóð fyrir glæsilegri kynningu á íslenskum fiski í Strassborg í Frakklandi, í samstarfi við fastanefnd Íslands í Evrópuráðinu í Strassborg.

Kynningin var haldin dagana 26. janúar til 5. febrúar og var unnin með þátttöku fjögurra virtra veitingastaða á svæðinu sem buðu viðskiptavinum sínum upp á ljúffenga íslenska sjávarrétti meðan á viðburði stóð. Þetta voru veitingastaðirnir The Drunky Stork Social Club, L‘Alsace a table, La Casserole og Le Cap d‘Hag í Halles du Marché Gare.

Opnunarviðburður fór fram í húsakynnum Drunky Strork Social Club miðsvæðis í Strassborg, einum veitingastaðanna. Viðburðinn sóttu alls um 200 manns en þar á meðal voru fjölmiðlar, starfsmenn sendiráða og ræðismenn, auk fulltrúa Íslandsstofu. Katrín Jakobsdóttir forsætisráðherra flutti ávarp til gesta þar sem hún kom m.a. inn á sérstöðu Íslands sem framleiðanda hágæða sjávarfangs og tengslin við franska markaðinn. Fanney Dóra Sigurjónsdóttir, eigandi veitingastaðarins Hnoss í Hörpu, var fulltrúi íslenskra matreiðslumanna á svæðinu. Bauð hún upp á góðmeti eldað úr íslenskum fiski og mældust réttirnir vel fyrir hjá gestum.

Kynningin var auglýst fyrir neytendum í gegnum samfélagsmiðla og náði til 230 þúsund manns á Strassborg svæðinu, auk þess birtist í staðbundnum miðlum (dagblöðum og útvarpi).

Seafood from Iceland markaðsverkefnið er vettvangur fyrir íslensk sjávarútvegsfyrirtæki til að vinna saman að markaðssetningu undir einu upprunamerki til að hámarka virði íslenskra sjávarafurða.