Markaðsstarf Íslandsstofu miðar að því að efla vitund um Ísland sem upprunaland hreinna og heilnæmra matvæla og náttúruafurða sem unnar eru með sjálfbærum hætti og vekja athygli á tækifærum sem felast í sjálfbærri nýtingu orku- og efnastrauma frá jarðvarmaverum, m.a. til hátækniframleiðslu á lífvirkum efnum með grænni orku. 

Markaðsstarfið á árinu

Íslandsstofa kom að skipulagningu ýmissa viðburða hér heima, m.a. kynningarfundi um þróun í framleiðslu þess sem kalla mætti framtíðarmatvæli og samtali fyrirtækja um frekara samstarf á sviði sölu og markaðssetningar fæðubótarefna og húðvara. Umfangsmestu aðgerðir á árinu tengdust stórum og krefjandi mörkuðum í vestri og austri.

Átta íslensk matvælafyrirtæki tóku þátt í Íslandsbás á vörusýningunni China International Import Expo í Sjanghæ í nóvember

Bandaríkin eru áherslumarkaður margra fyrirtækja sem freista þess að koma vörum sínum í smásöludreifingu. Til að styðja við það markaðsstarf hélt Íslandsstofa áfram góðu samstarfi við Business Sweden um fræðslu á netinu og viðburði tengda útflutningi matvæla og heilsuvara til Bandaríkjanna. 

Íslandsstofa skipulagði m.a. þjóðarbás á Natural Products Expo West sýningunni í Kaliforníu með þátttöku fjögurra fyrirtækja.

Kína var líka í fókus, en kínversk yfirvöld völdu að halda s.k. streymisviku á Íslandi í maí sem hófst með kynningarfundi Íslandsstofu og sendiráðs Kína. Hingað kom stór hópur áhrifavalda og fulltrúa vefmarkaðstorga til að vinna með íslenskum fyrirtækjum að kynningu og beinni sölu á vörum þeirra á netinu með frábærum árangri. Sum þessara fyrirtækja voru einnig í hópi átta fyrirtækja sem tóku þátt í Íslandsbás á sýningunni China International Import Expo í Sjanghæ. Lesa meira