Loading…

Mun Covid breyta veitingageiranum í BNA til framtíðar?

Mun Covid breyta veitingageiranum í BNA til framtíðar?

5. júní 2020

Nú á dögunum stóð Íslandstofa fyrir vefkynningu þar sem fjallað var um þær breytingar sem bandaríski veitingamarkaðurinn hefur gengið í gegnum síðustu vikur og mánuði. Viðburðurinn var skipulagður í samstarfi við aðalræðisskrifstofu Íslands í New York.

Kynningin var í höndum Dan Murphy sem hefur áratuga reynslu á sölu og dreifingu sjávarafurða á bandaríska markaðnum. Í erindi sínu, sem bar heitið „From dining out to dining in“ fór Dan yfir stöðuna í Bandaríkjunum og velti m.a. fyrir sér hvaða áhrif COVID-19 muni hafa á veitingamarkaðinn í þessu stærsta hagkerfi heimsins til lengri tíma.

Spár gera ráð fyrir um 30% fækkun veitingastaða í Bandaríkjunum

Samkvæmt Dan fór neysla sjávarafurða í Bandaríkjunum að langmestu leyti fram á veitingahúsum fyrir Covid, en í dag er öldin önnur. Mörg veitingahús hafa þurft að hætta rekstri og gera spár ráð fyrir að 30% þeirra muni ekki opna aftur. Dæmi eru um að stórar veitingahúsakeðjur muni draga verulega saman seglin eins og t.d. Red Lobster þar sem samdrátturinn er yfir 50% eða úr 600 veitingastöðum niður í 300, að hámarki. National Restaurant Association í Bandaríkjunum gerir ráð fyrir 225 billjón dollara tapi ári 2020.  

Dan starfar hjá Sea Watch International, sem sérhæfir sig meðal annars í dósasúpum. COVID-19 hefur haft mikil áhrif á hóp þeirra helstu viðskiptavina því skyndilega var bandaríska ríkið orðinn stærsti viðskiptavinur þeirra vegna matardreifinga og sala á sjávarafurðum í dósum jókst yfir 100%.

Þá er mjög misjafnt eftir tegund veitingastaða hversu mikil áhrif COVID eru. Þau sem bjóða upp á skyndibita og hraða afgreiðslu fá fleiri viðskiptavini, sem og staðir þar sem borðað er utanhúss. Fínni og dýrari staðir með hærra þjónustustig sjá fram á erfiða tíma. Veitingastöðum hefur ekki aðeins verið að fækka heldur hafa margir þeirra einnig minnkað valkosti á matseðli. Áður var algengt að 5-6 fiskréttir væru í boði en í dag er dæmigert að þeir séu tveir, þá helst rækjur og lax.

Möguleg tækifæri í innflutningi íslenskra sjávarafurða 

Stór hluti innfluttra sjávarafurða til BNA hefur komið frá Kína en í mars  dróst innflutningur á kínverskum sjávarafurðum verulega saman eða um 67%, sem getur mögulega skapað tækifæri fyrir íslenskan fisk. Neytendur eru núna mun meðvitaðri um uppruna vörunnar sem þeir innbyrða og leggja meiri áherslu á gæði. Þetta vinnur með íslenskum vörum og getur skapað samkeppnisforskot fyrir okkur. Þá nefndi Dan að Walmart hefði lokað öllum ferskfiskborðum í verslunum sínum sem voru 6.000 talsins. Í staðinn voru settir upp kælar þar sem hægt er að kaupa ferskan forpakkaðan fisk og er að seljast mjög vel. Í þessu geta einnig falist tækifæri fyrir íslenskan fisk.

Neyslan breyst og komin inn á heimilin í auknum mæli

Staðan eftir COVID á mörgum mörkuðum er gjörbreytt og það mun án efa hafa áhrif á sölu á íslenskum fiski. Fólk heldur áfram að borða sjávarfang en neyslan hefur færst inn meira á heimilin. Við þessu þurfa íslenskir útflytjendur að bregðast. Langmest af íslenska fiskinum sem seldur er til Bandaríkjanna hefur hingað til farið inn á veitingamarkaðinn, einkum fínni veitingastaði. En á þessu hefur orðið mikil breyting og Þegar markaður lokaðist leituðu útflytjendur og dreifingaraðilar leiða til að færast yfir í smásöluna en þar hafa sterkar keðjur eins og Costco og Whole Foods aukið framboð af ferskum íslenskum fiski, aðallega þorski, bæði ferskum og ferskum frystum.

Hér má sjá kynningu Dan


Deila