Loading…

Góð fyrirheit varðandi ferðalög til Íslands

Góð fyrirheit varðandi ferðalög til Íslands

9. júlí 2020

Traust erlendra aðila sem selja ferðir til Íslands er mikið. Svokölluð meðmælatryggð hefur aldrei mælst hærri en hugtakið metur samspil þeirra sem mæla með ferðalögum til Íslands og þeirra sem gera það ekki.

Þættir eins og öryggi og sjálfbærni Íslands sem áfangastaðar hafa þar mikil áhrif auk viðbragða stjórnvalda við COVID-19 heimsfaraldrinum.

 „Þetta eru jákvæðar fréttir sem gefa góð fyrirheit,” segir Sigríður Dögg Guðmundsdóttir, fagstjóri ferðaþjónustu hjá Íslandsstofu. „Hækkun á meðmælatryggð sýnir að Ísland er að uppfylla væntingar erlendra söluaðila. Viðbrögð stjórnvalda við COVID-19 og toppsæti Íslands á Global Peace Index virðast hafa ýtt enn frekar undir ímyndina um Ísland sem öruggan áfangastað, nokkuð sem skiptir miklu máli á þessum óvissutímum. Við erum jafnframt ánægð að sjá hve ofarlega sjálfbærni áfangastaðarins er í huga þátttakenda, enda er sjálfbærni lykillinn að nýrri útflutningsstefnu Íslands.“

Erlendir ferðasöluaðilar frá Þýskalandi eru bjartsýnni en söluaðilar frá öðrum markaðssvæðum gagnvart ferðalögum viðskiptavina sinna til Íslands í kjölfar COVID-19, en helmingur þeirra gerir ráð fyrir ferðalögum strax í sumar. Söluaðilar frá Norðurlöndunum, Bretlandseyjum auk Suður- og Mið-Evrópu gera jafnframt ráð fyrir talsverðum ferðalögum í sumar, og að bókanir verði komnar í svo til eðlilegt horf næsta vor. Söluaðilar frá Norður-Ameríku og fjarmörkuðum telja að bókanir og ferðalög nái aftur á móti ekki eðlilegu horfi fyrr en í byrjun næsta árs.

„Það kemur okkur ekki á óvart að nærmarkaðir virðast ætla að taka fyrr við sér enda er það í takt við áherslur okkar í markaðsverkefninu Saman í sókn. Við fylgjumst að sjálfsögðu vel með þróuninni á okkar helstu markaðssvæðum og lögum aðgerðir okkar að breytingum sem kunna að verða þar á,“ segir Sigríður Dögg.

Sjá niðurstöður könnunarinnar


 

Deila