Miðlum árangri Íslands á erlendum mörkuðum 

Endurnýjanleg orka hefur lengi verið einn af hornsteinum íslenskrar gjaldeyrisöflunar. Þekking og reynsla íslenskra fyrirtækja á sviði orkunýtingar hefur jafnframt ýtt undir spennandi nýsköpun á sviði grænna lausna sem nýst geta víða um heim. 

Green by Iceland er markaðsverkefni sem miðar að því að auka vitund um sjálfbæra nýtingu auðlinda á Íslandi og kynna íslenskar grænar lausnir á erlendum mörkuðum. Starfsfólk Íslandsstofu sótti 10 viðburði til þess að kynna Ísland og íslenskar grænar lausnir á árinu. Þar á meðal voru World Geothermal Congress, stærsta jarðvarmaviðburð ársins, og Sustainable Innovation Forum, sem er hliðarviðburður á COP26. Vefviðburðir voru skipulagðir í samstarfi við sendiráð í Tékklandi og í Brussels. Viðskiptasendinefndir fóru til Kaupmannahafnar, Oslóar og Lundúnar.  

Þá framleiddi Green by Iceland kynningarmyndbönd um jarðvarmaþekkingu, tækifæri tengd fjölnýtingu jarðvarma, þekkingu á nýtingu vatnsafls, og nýjungar í kolefnisbindingu; líkt og nýtingu og förgun. Green by Iceland er einnig virkt á LinkedIn og Facebook. 

Góður árangur náðist í almannatengslum á árinu en alls birtust 1,097 umfjallanir tengdar íslenskum lausnum og auðlindanýtingu í erlendum miðlum. Markaðsstarf Green by Iceland náði 839,400,000 snertingum á árinu. 

Samstarfsvettvangur um loftslagsmál og grænar lausnir 

Grænvangur er samstarfsvettvangur atvinnulífs og stjórnvalda um loftslagsmál og grænar lausnir. Grænvangur stóð fyrir Loftslagsmóti í samstarfi við Festu, Rannís/EEN og Atvinnuvega- og nýsköpunarráðuneytið.  

Loftslagsvegvísir atvinnulífsins var gefinn út í fyrsta sinn í samstarfi við Bændasamtök Íslands, Samorku, Samtök ferðaþjónustunnar, Samtök iðnaðarins, Samtök fjármálafyrirtækja, Samtök fyrirtækja í sjávarútvegi og Samtök verslunar og þjónustu. Vegvísirinn var gerður að frumkvæði atvinnulífsins sem sýnir vilja og áhuga á að láta að sér kveða á sviði loftslagsmála. Í tilefni útgáfunnar sagði Katrín Jakobsdóttir forsætisráðherra: „Útgáfan nú er fyrsta skrefið sameiginlegri vegferð atvinnulífsins í loftslagsmálum sem getur stutt vel við aðgerðaráætlun stjórnvalda. Mikilvægt er að við byggjum á þessari góðu vinnu og höldum áfram í næsta áfanga.“