Flosi Eiríksson
Verkefnisstjóri, ráðgjöf og fræðsla

Eftir að markaður hefur verið valinn er mikilvægt að sannreyna hvort hann sé eins álitlegur og virðist í fyrstu. Íslandsstofa notar aðkeypta sérfræðiráðgjöf í þetta verkefni og niðurgreiðir þjónustuna við fyrirtæki sem taka þátt. Því er m.a. mikilvægt að búið sé að hitta starfsmann Íslandsstofu til að greina stöðu fyrirtækisins lauslega með tilliti til útflutnings.

Umsóknarferlið

1. Sótt er um þátttöku í verkefninu „Markaðsskönnun“ með því að fylla út beiðni sem má finna hér og berst sjálfkrafa til Íslandsstofu.

2. Starfsmaður Íslandsstofu hefur samband innan 2ja virkra daga og í framhaldinu er fyrirtæki beðið að senda nánari upplýsingar áður en hægt er að taka formlega afstöðu til umsóknarinnar.

3. Þegar þær upplýsingar liggja fyrir er umsóknin formlega tekin fyrir af stýrihópi verkefnisins innan 3ja virkra daga. Ef einhverjar upplýsingar vantar í umsóknina til að fyrirtækið fái inngöngu í verkefnið fær það tækifæri til að bæta úr því og er umsóknin þá tekin fyrir á nýjan leik.

Framkvæmdin

Þegar umsókn fyrirtækis í verkefnið hefur verið samþykkt skrifar fyrirtækið undir samning við Íslandsstofu sem inniheldur skyldur allra aðila sem að verkefninu koma þ.e. fyrirtækis, Íslandsstofu og ráðgjafa. Að því loknu hefst samvinna ráðgjafa og fyrirtækis en mikilvægt er á þessum tímapunkti að ráðgjafi kynnist starfsemi fyrirtækisins sem best til að gera sér betur grein fyrir hvers konar samstarfsaðilum hann eigi að leita að.

Megin markmið þessa hluta verkefnisins er að finna hvort möguleiki sé fyrir vöruna/þjónustuna á að komast inn á viðkomandi markað og þá með hvaða hætti sé best að framkvæma það.

Útkoman er u.þ.b. tveggja blaðsíðna skýrsla þar sem farið er yfir helstu hindranir og tækifæri á markaðnum ásamt tillögu að inngönguleið. Skýrslunni er skilað til starfsmanns Íslandsstofu sem boðar þá fulltrúa fyrirtækis á fund þar sem metnir eru möguleikar á ávinningi á móti kostnaði og reynt að komast að niðurstöðu um hver næstu skref ættu að vera.

Kostnaður

Hver einstök markaðsskönnun kostar hvert þátttakandi fyrirtæki 90.000 kr. Íslandsstofa borgar sömu upphæð á móti þeim fyrirtækjum sem uppfylla þátttökuskilyrði í verkefninu.