Skaginn hlýtur Útflutningsverðlaun forseta Íslands og Vigdís Finnbogadóttir heiðruð

Íslenska tækni- og framleiðslufyrirtækið Skaginn hlaut síðdegis í dag Útflutningsverðlaun forseta Íslands sem veitt voru í 29. skipti. Ingólfur Árnason, framkvæmdastjóri Skagans veitti verðlaununum viðtöku við hátíðalega athöfn á Bessastöðum.

Frú Vigdís Finnbogadóttir, fyrrum forseti Íslands, var sæmd sérstakri heiðursviðurkenningu við sama tilefni. Viðurkenninguna hlýtur hún fyrir að hafa með starfi sínu hafa borið hróður Íslands víða um heim og stuðlað að jákvæðu umtali um land okkar og þjóð. 

Byltingakenndar tækninýjungar við íslausa kælingu

Skaginn hf. fær verðlaunin fyrir að hafa náð afar athyglisverðum árangri í að þróa, framleiða og selja tækjabúnað fyrir matvælaiðnaðinn, einkum fiskvinnsluna.

Fyrirtækið er í fremstu röð þeirra íslensku fyrirtækja sem hafa náð að brjóta sér leið inn á alþjóðlegan matvælamarkað með framleiðsluvörur sem í upphafi eru þróaðar í nánu samstarfi við íslensk framleiðslufyrirtæki. Sérstaða Skagans hf. er fólgin í byltingarkenndum tækninýjungum hvað varðar íslausa kælingu á matvælum, sjálfvirkni og lausnum við pökkun og flutning á afurðunum.

Stofnun fyrirtækisins má rekja aftur til ársins 1985 þegar Ingólfur Árnason aðaleigandi Skagans hf. hóf að vinna við nýsköpun og þróun á vinnslubúnaði fyrir fiskiðnað. Í dag er fyrirtækið rekið í þremur einingum sem eru Skaginn hf., Þorgeir og Ellert hf. og 3X Technology á Ísafirði. Þessi þrjú systurfyrirtæki vinna þétt saman að þróun, hönnun og framleiðslu og eru framleiðsluvörurnar kynntar og seldar undir sameiginlegu merki félaganna - Skaginn 3X.

Skaginn hefur selt vörur sínar víðsvegar um heiminn. Meginþunginn hvað fiskiðnað varðar er á svæðinu í kringum Norður Atlantshaf og hvað kjötiðnað varðar þá er hann mestur í Suður- og Norður-Ameríku. Síðasti landvinningur fyrirtækisins var sala á frysti fyrir kjúklingavinnslu í Chile. 

Vigdís Finnbogadóttir heiðruð fyrir að bera hróður Íslands víða um heim

Við sama tilefni var frú Vigdísi Finnbogadóttur, fyrrum forseta, veitt sérstök heiðursviðurkenning fyrir að hafa með starfi sínu hafa borið hróður Íslands víða um heim og stuðlað að jákvæðu umtali um land okkar og þjóð. 

Sigur Vigdísar í forsetakosningunum varpaði kastljósi alheimsins á hana og á Ísland í leiðinni.
Í ræðu sinni um Vigdísi hafði Sigsteinn Grétarsson, formaður úthlutunarnefndar m.a. á orði:
„Við Íslendingar spegluðum okkur í þeirri mynd sem Vigdís dró upp af landi okkar og þjóð. Hún minnti okkur á að það er lán að vera fæddur hér á landi, hún minnti okkur á mikilvægi þess að standa vörð um íslenska tungu og kunna skil á sögu þjóðarinnar og menningu. Og ekki hvað síst minnti hún okkur á að konur og karlar eru jafnokar á öllum sviðum.“

Nýbygging fyrir Stofnun Vigdísar Finnbogadóttur í erlendum tungumálum vígð 

Eftir að Vigdís lét af embætti hefur hún unnið að ýmsum málum, einkum tengdum menningu og tungumálum. Hún er m.a. velgjörðar sendiherra UNESCO og er meðlimur í samtökunum Council of Women World Leaders. Frá árinu 2001 hefur rannsóknarstofnun Háskóla Íslands í erlendum tungumálum verið kennd við hana og á morgun – sumardaginn fyrsta – verður nýbygging fyrir  Stofnun Vigdísar Finnbogadóttur í erlendum tungumálum vígð við hátíðlega athöfn. Þar verður starfrækt fræðslu- og upplifunarsetur og í húsinu er aðstaða fyrir fyrirlestra-, ráðstefnu- og sýningarhald. Þar verður einnig Vigdísarstofa, tileinkuð Vigdísi Finnbogadóttur, þar sem hægt verður að fræðast um líf hennar og störf.

Verðlaunagripurinn

Verðlaunagripurinn í ár, sem fyrirtækið Skaginn fékk í hendur, er gerður af listakonunni Guðrúnu Halldórsdóttur og heitir verkið Sjómaðurinn. Listamaðurinn segir um verkið sitt að „óbilandi kjarkur og kapp fiskimannsins geri mynd hans að verðugu tákni fyrir tækninýjungar sem sprottnar eru úr frjóum jarðvegi sjávarplássanna íslensku. Í hendi sér heldur sjómaðurinn á þremur fiskum, sem segja má að séu tákngerfingar þeirra þriggja eininga sem fyrirtækið byggir á.“

Um útflutningsverðlaunin

Tilgangurinn með veitingu útflutningsverðlaunanna er að vekja athygli á  þjóðhagslegu mikilvægi gjaldeyrisöflunar og alþjóðlegra viðskipta og heiðra þá sem hafa náð sérstaklega góðum árangri í sölu og markaðssetningu á íslenskum vörum og þjónustu erlendis.

Útflutningsverðlaunin eru nú veitt í 29. sinn en þau voru fyrst veitt árið 1989. Meðal annarra fyrirtækja er hlotið hafa verðlaunin í gegnum tíðina eru Bláa lónið, CCP, Hampiðjan, Trefjar ehf, Icelandair Group og Ferðaskrifstofa bænda, og á síðasta ári hlaut Nox Medical verðlaunin.

Í úthlutunarnefndinni sátu að þessu sinni: Örnólfur Thorsson, frá embætti forseta Íslands, Runólfur Smári Steinþórsson, frá viðskipta- og hagfræðideild Háskóla Íslands, Björgólfur Jóhannsson frá Viðskiptaráði, Þórunn Sveinbjörnsdóttir, frá Alþýðusambandi Íslands og Sigsteinn Grétarsson frá Íslandsstofu, en Íslandsstofa ber ábyrgð á undirbúningi og kostnaði við verðlaunaveitinguna.