Mikill áhugi á auknum fjárfestingum í ferðaþjónustu
Mikill áhugi er á auknum fjárfestingum í ferðaþjónustu hérlendis. Þetta kom fram á fjölsóttu málþingi sem Landsbankinn og Íslandsstofa stóðu fyrir um fjárfestingar í ferðaþjónustu.
Einnig kom fram að það þarf á aukinni innlendri og erlendri fjárfestingu að halda til að auka arðsemi greinarinnar til frambúðar. Ennfremur að það væri þörf fyrir uppbyggingu á fleiri markaðssvæðum í þágu fjölbreyttari afþreyingar og upplifana.
Um 300 þátttakendur mættu á málþing Landsbankans og Íslandsstofu á Hilton Reykjavík Nordica 25. janúar sl. Þar ræddu innlendir og erlendir sérfræðingar og fulltrúar ferðaþjónustufyrirtækja fjárfestingar í greininni frá ýmsum hliðum. Kynntar voru niðurstöður nýrrar könnunar um viðhorf fulltrúa ferðaþjónustufyrirtækja til fjárfestinga sem Capacent vann fyrir Landsbankann og Íslandsstofu auk skýrslu Hagfræðideildar Landsbankans um ferðaþjónustuna og fjárfestingar.
Satu Luiro frá þróunarstofu sveitarfélaga í Lapplandi rakti hvernig markviss stefnumótun um uppbyggingu innviða og eflingu fjárfestinga í aðstöðu fyrir ferðamenn hefur skapað net fjölsóttra ferðamannastaða í Norður-Finnlandi.
Erindi Satu
Þar er áherslan lögð á upplifun af mismunandi árstíðum til að skapa stöðugleika í greininni. Jöfnun árstíðarsveiflunnar í aðsókn ferðamanna er einmitt forgangsatriði hér á landi að mati forsvarsmanna fyrirtækja í íslenskri ferðaþjónustu eins og fram kom í erindi Árna Gunnarssonar, formanns SAF og forstjóra Flugfélags Íslands í erindi hans um stefnumótun ferðaþjónustunnar.
Erindi Árna
Hægt er að laða að fjölbreytta fjárfestingu einkaaðila á móti opinberri fjárfestingu á grundvelli sjálfbærrar ferðaþjónustu og líffræðilegs fjölbreytileika svæða eins og fram kom í erindi Ignace Schops frá Belgíu. Hann stýrir samtökum sem hafa haft forgöngu um uppbyggingu vistvænnar ferðaþjónustu í kringum verðlaunaþjóðgarðinn Hoge Kempen og atvinnusögu bæjanna umhverfis.
Erindi Schops
Bala Kamallakharan frá Auro Investment Partners lagði ríka áherslu á að íslensk ferðaþjónusta ætti ekki að byggja sig upp til að keppa á grundvelli verðlags heldur gæða og upplifunar. Sækjum á toppinn en ekki leita að botninum voru skilaboð Bala. Fyrirtæki hans á og rekur fjölda hótela í hæsta gæðaflokka víða um heim og hyggur nú á uppbyggingu á Skálafelli við Þingfelli.
Erindi Kamallakharan
Þórður H. Hilmarsson forstöðumaður Fjárfestingarsviðs Íslandsstofu benti á kosti þess að fá beina erlenda fjárfestingu inn í íslenska ferðaþjónustu. Slíkri fjárfestingu fylgir gjarnan mikil þekking á áhættumati vegna stærri verkefna og tengsl við markaði. Erlend fjárfesting er líklegust í stórverkefnum og góður undirbúningur er lykilatriði fyrir þá sem vilja leita erlendrar fjárfestingar.
Erindi Þórðar
Forsvarsmenn fyrirtækja í ferðaþjónustu eru afar jákvæðir gagnvart erlendri fjárfestingu skv. niðurstöðum nýrrar könnunar Capacent sem Gísli Steinar Ingólfsson kynnti á málþinginu. Átta af hverjum tíu fyrirtækjum þurfa aukið fjármagn á næstu árum og tæpur þriðjungur er líklegur til að leita eftir aðkomu fjárfesta í því skyni. Nærri 40% fyrirtækjanna þarf innan við 10 milljónir kr., fjórðungur þarf á bilinu 10 til 50 milljónir en aðrir meira. Meirihluti forsvarsmanna taldi aðgengi að lánsfé til fjárfestinga í greininni ekki nógu gott. Ferðaþjónustan er hins vegar nokkuð bjartsýn á framtíðarhorfurnar.
Könnun Capacent
Gústaf Steingrímsson, hagræðingur, kynnti nýja skýrslu Landbankans um þróun fjárfestingar og rekstrarafkomu í ferðaþjónustu. Þar kemur fram að staða greinarinnar hefur farið batnandi undanfarin ár en fjárfesting hefur verið takmörkuð frá 2008. Sé litið til þróunar skatttekna innan ferðaþjónustunnar hefur vöxturinn verið mestur í afþreyingu og tómstundastarfsemi eða fimmföldun milli áranna 2000 og 2008. Greiðslugeta greinarinnar af skuldum hennar hefur batnað frá 2008.
Erindi Gústafs
Skýr viðskiptaáætlun með trúverðugum forsendum er lykillinn að því að tryggja sér fjármögnun. Davíð Björnsson, Fyrirtækjabanka Landsbanks, fór yfir þau atriði sem fyrirtæki í ferðaþjónustu þurfa að hafa í huga þegar þau nálgast fjárfesta.
Erindi Davíðs
Helga Valfells framkvæmdastjóri Nýsköpunarsjóðs atvinnulífsins tók undir ábendingar Davíðs og sagði sjóðinn tilbúinn að taka áhættu með fyrirtækjunum. NSA hefur hins vegar takmarkaða reynslu af fjárfestingum í ferðaþjónustu og Helga lýsti yfir áhuga á að vinna meira með greininni í framtíðinni enda ferðaþjónustan í örum vexti.
Erindi Helgu
Þeir Þorsteinn Jóhannesson rekstrarstjóri hjá Norðursiglingu og Róbert Guðfinnsson eigandi Rauðku sögðu gestum frá uppbyggingu sinna fyrirtækja og fjármögnun. Þorsteinn lagði áherslu á að fyrirtæki í ferðaþjónustu gerðu ríka kröfu til ávöxtunar á eigin fé þegar verið er að bera saman fjármögnunarleiðir. Hann sagði það sína skoðun að aðilar ættu ekki að óttast að fá fjárfesta með inn í sín fyrirtæki enda alltaf hægt að ganga þannig frá málum að báðir hafi útgönguleið.
Erindi Þorsteins
Erindi Róberts
